Ymwybyddiaeth ar y Draffordd

Ynglŷn â'r cwrs

Mae’r Cwrs Cenedlaethol Ymwybyddiaeth ar y Draffordd ar gyfer ystafelloedd dosbarth digidol (iNMAC) yn ymyrraeth ddengar, ddiddorol a phleserus sy’n arwain at newid parhaus yn y ffordd y mae mynychwyr yn gyrru ar draffyrdd, gan gynnwys Traffyrdd Deallus. Mae’n opsiwn addysgol ac adsefydlol i’r rheiny sydd wedi cyflawni trosedd ar draffyrdd, ac sydd wedi cael eu dargyfeirio o’r llys gan yr heddlu trwy roi Hysbysiad Cosb Benodedig Amodol (CFPN).

Nid yw’r cwrs yn codi cywilydd ar unigolion, yn eu barnu, nac yn eu dwyn i gyfrif am y drosedd a gyflawnwyd. Ac ni fydd yr hyfforddwr sy’n cyflwyno’r cwrs yn gofyn i unrhyw un yn y grŵp siarad am eu trosedd. Ni fydd pobl sy’n cwblhau’r cwrs yn llwyddiannus (ac unrhyw amodau eraill a bennir gan yr heddlu) yn cael eu herlyn am y drosedd wreiddiol.

Mae’r cwrs yn para 2.5 awr, a gall y pris amrywio gan ddibynnu ar yr heddlu sy’n cyfeirio.

Cliciwch yma ar gyfer Telerau ac Amodau.

Mynychu’r cwrs

Mae’r cwrs wedi’i gynllunio i fynd â chi ar daith sydd:

• Yn esbonio beth yw traffordd ddeallus, sut mae’n gweithio, a’r buddion y mae’n eu cynnig
• Yn dwyn sylw at yr arwyddion y byddwch yn dod ar eu traws ar draffyrdd ddeallus
• Yn archwilio’r canlyniadau posibl i chi, a phobl eraill, os byddwch yn gyrru’n rhy gyflym neu’n gyrru mewn lonydd ar gau
• Yn arddangos y gwahaniaeth y mae gyrru’n rhy gyflym yn ei wneud os bydd angen i chi stopio’n sydyn
• Yn archwilio’r sefyllfaoedd sy’n ei gwneud yn fwy anodd cydymffurfio â rheolau traffyrdd
• Yn eich helpu i lunio cynllun gweithredu ynglŷn â sut y byddwch chi’n gyrru’n wahanol yn y dyfodol

Mae’r rhan fwyaf o fynychwyr wedi cyflawni trosedd ar draffyrdd deallus, felly mae’r cwrs yn canolbwyntio ar esbonio sut mae traffyrdd deallus yn gweithio ac ystyr yr arwyddion y gallant ddod ar eu traws. Fodd bynnag, efallai bod rhai mynychwyr wedi’u cyfeirio am yrru ar y llain galed neu fethu â chydymffurfio â X coch ar draffordd draddodiadol.